மறதி நோய் அல்லது நினைவிழப்பு என்பது தமிழ் சினிமாவில் பல ஆண்டுகளாக முக்கியமான கதைக்கள அம்சமாக பயன்படுத்தப்பட்டு வருகிறது. காதல், குடும்பம், த்ரில்லர், நகைச்சுவை மற்றும் பழிவாங்கும் கதைகள் என பல்வேறு வகை திரைப்படங்களில் நினைவிழப்பு கதையின் திருப்புமுனையாக செயல்பட்டுள்ளது. சமீபத்தில் வெளியாகவுள்ள காதல் ரீசெட் ரிப்பீட் திரைப்படமும் 24 மணி நேரத்திற்கு மேல் நினைவில் வைத்துக்கொள்ள முடியாத பெண்ணின் வாழ்க்கையை மையமாகக் கொண்டு உருவாகியுள்ளது.
அதற்கு முன்பே நினைவிழப்பை மையமாக வைத்து ரசிகர்களை கவர்ந்த சில முக்கியமான தமிழ் திரைப்படங்களை பார்ப்போம்.
மூன்றாம் பிறை
1982 ஆம் ஆண்டு பாலுமகேந்திரா இயக்கத்தில் வெளியான மூன்றாம் பிறை, தமிழ் சினிமாவின் காலத்தால் அழியாத காதல் திரைப்படங்களில் ஒன்றாகும். ஸ்ரீதேவி நடித்த பக்யலட்சுமி என்ற இளம் பெண் விபத்துக்குப் பிறகு தனது பழைய நினைவுகளை இழக்கிறார். அவரை காப்பாற்றும் ஆசிரியரான சீனுவாக கமல்ஹாசன் நடித்துள்ளார். இருவருக்கும் இடையே உருவாகும் அன்பும், பின்னர் நினைவு திரும்பிய பிறகு ஏற்படும் உணர்ச்சிகரமான பிரிவும் இந்த திரைப்படத்தை மறக்க முடியாத படைப்பாக மாற்றியுள்ளது.
கஜினி
2005 ஆம் ஆண்டு ஏ.ஆர். முருகதாஸ் இயக்கத்தில் வெளியான கஜினி திரைப்படத்தில் சூர்யா நடித்த சஞ்சய் ராமசாமி, தலையில் ஏற்பட்ட காயத்தால் 15 நிமிடங்களுக்கு மேல் புதிய நினைவுகளை பதிவு செய்ய முடியாத நிலைக்கு தள்ளப்படுகிறார். புகைப்படங்கள், குறிப்புகள் மற்றும் உடலில் பச்சைக் குத்திய தகவல்களை வைத்து தனது வாழ்க்கையை முன்னெடுக்கும் அவர், காதலியை கொன்றவர்களை பழிவாங்கும் முயற்சியே படத்தின் மையக்கருவாக அமைகிறது. தமிழ் சினிமாவில் நினைவிழப்பை ஆக்ஷன் த்ரில்லர் வடிவில் வெற்றிகரமாக கையாண்ட முக்கியமான திரைப்படமாக கஜினி திகழ்கிறது.
தீபாவளி
2007 ஆம் ஆண்டு எழில் இயக்கத்தில் வெளியான தீபாவளி திரைப்படத்தில் பாவனா நடித்த சுசி, விபத்துக்குப் பிறகு தனது வாழ்க்கையின் குறிப்பிட்ட சில ஆண்டுகளை மறந்து விடுகிறார். ரவி மோகன் நடித்த பில்லுவை காதலித்த பிறகும், மீண்டும் நினைவிழப்பால் அவரை அடையாளம் காண முடியாத நிலை உருவாகிறது. தனது காதலை மீண்டும் நினைவூட்ட போராடும் நாயகனின் உணர்வுப்பூர்வமான பயணத்தை இந்த திரைப்படம் அழகாக பதிவு செய்கிறது.
நடுவுல கொஞ்சம் பக்கத்த காணோம்
2012 ஆம் ஆண்டு பாலாஜி தரணீதரன் இயக்கத்தில் வெளியான இந்த திரைப்படத்தில் விஜய் சேதுபதி நடித்த பிரேம் குமார், திருமணத்திற்கு இரண்டு நாட்களுக்கு முன்பு ஏற்பட்ட விபத்தால் நினைவிழப்புக்கு ஆளாகிறார். திருமணம் நடைபெறும் வரை இந்த உண்மையை மறைத்து சமாளிக்க நண்பர்கள் எடுக்கும் முயற்சிகளே திரைப்படத்தின் நகைச்சுவை மற்றும் சுவாரஸ்யமான தருணங்களை உருவாக்குகின்றன. உண்மை சம்பவத்தை அடிப்படையாகக் கொண்டு உருவான இந்த திரைப்படம் தமிழ் சினிமாவின் சிறந்த நகைச்சுவை படங்களில் ஒன்றாக கருதப்படுகிறது.
மிஸ் யூ
2024 ஆம் ஆண்டு வெளியான மிஸ் யூ திரைப்படத்தில் சித்தார்த் நடித்த வாசு, விபத்துக்குப் பிறகு நினைவிழப்பால் அவதிப்படுகிறார். பெங்களூரில் சுபுலட்சுமியை சந்தித்து காதலிக்கும் அவர், உண்மையில் அந்த பெண் தனது மனைவி என்பதையே மறந்து வாழ்கிறார். இந்த உண்மை பின்னர் வெளிப்படும்போது காதல், நகைச்சுவை மற்றும் உணர்ச்சிகள் கலந்த கதையாக திரைப்படம் நகர்கிறது.
நினைவிழப்பு என்பது தமிழ் சினிமாவில் வெறும் மருத்துவ நிலையாக மட்டும் பயன்படுத்தப்படவில்லை. காதல், இழப்பு, தியாகம், பழிவாங்குதல், நகைச்சுவை மற்றும் மனித உறவுகளின் ஆழத்தை வெளிப்படுத்தும் முக்கியமான கதைக்கள கருவியாக அது தொடர்ந்து பயன்படுத்தப்பட்டு வருகிறது. மூன்றாம் பிறை முதல் மிஸ் யூ வரை, பல்வேறு காலகட்டங்களில் வெளியான இந்த திரைப்படங்கள், நினைவிழப்பை வெவ்வேறு கோணங்களில் அணுகி ரசிகர்களின் மனதில் தனித்த இடத்தை பிடித்துள்ளன.